एसके राय
सिरहा,१६ फागुन। सिरहामा भईरहेको हत्या, बलात्कार र जातीय छुवाछुत गर्नेहरुलाई कार्वाहीको माँग गर्दै किशोरीहरुले शुक्रवार गोलबजारमा दवाव र्याली निकालेका छन्। नगरस्तरीय किशोरी सञ्जाल, गोलबजारले रिङ्कु सदायको सामूहिक बलात्कार पछिको शङ्कास्पद मृत्यु, वस्तिपुर मा.वि.मा भएको छुवाछुतको घटनामासंल्गनलाई कार्वाहीको माँग गर्दै दवार र्याली निकालेका हुन्।
र्याली पछि गोलबजारको मुख्य चोकमा भएको कोणसभाका बक्ताहरुले रिङ्कु सदायले न्याय पाउनेमा आफूहरु अझै विश्वस्त रहेको बताए। उनीहरुले, ‘हामी अझै न्यायलय र प्रहरी प्रशासनमाथि विश्वास्त छौं। रिङ्कु सदायहरुले न्याय पाउने छन्। त्यस्तो भएन भने प्रहरी प्रशासन र न्यायलयप्रति जनताको विश्वास गुमेर जानेछ।’
उनीहरुले घटनालाई सामसुम पार्न यहाँका ठूला नेताहरु पनि लागि भन्ने सूचनाहरु सार्वजनिक भएको भन्दै अपराधी बचाउने खेलमा लागेका नेताहरुको पनि उचित समयमा मूल्याङ्कन हुने बक्ताहरुले बताए।
नवराजपुर गाउँपलिका १ भगवतीपुरकी १७ वर्षिय रिङ्कु गत माघ ३० गते आफुनै घरमा मृत अवस्थामा फेला परेका थिए। स्थानीयबासीले घटनालाई सङ्कास्पद भन्दै निष्पक्ष छानबिनको माँग गरेका छन्। मृतकका परिवारजनले घटनामा संलग्न र पञ्चायतिमा बसेकाहरु विरुद्ध किटानी जाहेरी दिएका छन्। किटानी जाहेरी दिएकामध्ये आजसम्म एक जनापनि पक्राउ परेका छैनन्।
प्रदर्शनकारीहरूले घटनाको अनुसन्धानलाई प्रभावकारी बनाउन दबाब दिएका छन्। प्रहरी प्रशासनले छानबिनमा ढिलाइ र प्रभावकारी कदम नचालेको आरोप लगाएका छन्।
प्रदर्शनमा मानव अधिकारकर्मी, सामाजिक अभियन्ता, विद्यार्थी, र स्थानीयबासीको उल्लेख्य सहभागिता रहेको थियो।
