रौतहट, १४ फागुन। रौतहटको एउटा सामुदायिक विद्यालयमा एकै परिवारका चार सदस्य विभिन्न पदमा रहेको पाइएको छ। गुजरा नगरपालिका–५, ईशलाम्पुर गाउँमा रहेको श्री रहमान प्राथमिक विद्यालयमा एकै परिवारको हालीमुहाली देखिएको हो।
सो विद्यालयको व्यवस्थापन समितिको अध्यक्षमा करिब एक दशकदेखि गुजरा–५, ईश्लामपुरका अवकास प्राप्त शिक्षक मजीबु रहमान छन्। विद्यालयको प्रधानाध्यापकमा उनकै छोरा महमद अफरोज आलम छन्।
प्रधानाध्यापक अफरोजको छोरी गुलशन नेसा शिक्षिकाका रूपमा कार्यरत छिन् भने आफरोजकै पत्नी सबरिन खातुन पियन छिन्।
विद्यालयमा बढेको बेथितिलाई स्थानीयवासीले सोमबार पत्रकार सम्मेलनमार्फत उजागर गरे। स्थानीय समाजसेवी तथा नेपाली कांग्रेसका जिल्ला सहसचिव फिरोज आलमका अनुसार मजीबु रहमान लक्ष्मीपुर प्राविमा कार्यरत हुँदा रहमान प्राविको व्यवस्थापन समितिको अध्यक्षमा उनकै परिवारका अन्य सदस्य थिए। उनले अवकाश पाएपछि एक दशक यता विद्यालय व्यवस्थापन समितिको अध्यक्ष रहँदै आएको आलमले बताए।
२०७४ सालको स्थानीय तह निर्वाचनपछि गुजराका नगर शिक्षा संयोजक शिवमंगल साहकै मिलोमतोमा रहमान प्राविका प्रधानाध्यापक अफरोजले लाखौँ भ्रष्टाचार गरेको आरोप पत्रकार सम्मेलनमा स्थानीयवासीले लगाए।
रहमान प्राविमा हाल कक्षा १ देखि ५ सम्म झण्डै १५० जना विद्यार्थी अध्ययनरत छन् तर शिक्षा संयोजकसँग मिलेर प्रधानाध्यापक अफरोजले विधार्थी संख्या ३६० देखाएर नगरपालिकाबाट सम्पूर्ण सुविधा लिँदै आएको आलमले बताए। विद्यालयको समिति र विद्यार्थी संख्या लगायत अन्य जानकारीका लागि पटकपटक गुजरा नगर शिक्षा संयोजक शिवमंगल साहलाई भन्दा बेवास्ता गरेको उनको आरोप छ।
कक्षा १ देखि ५ सम्मका प्रति विद्यार्थी खाजा बापत दैनिक १५ रुपैयाँ, पाठ्यपुस्तक सरदर ५०० रुपैयाँ र छात्रवृत्ति छात्रा सम्पूर्ण र दलित छात्रालाई सरकारले ४०० रुपैया दिँदै आएको छ। यसरी आउने अनुदान दुरुपयोग गर्नकै लागि विद्यार्थी संख्या बढाएर देखाइएको स्थानीयको आरोप छ।
पत्रकार सम्मेलनमा सहभागी वडा ५ का अध्यक्ष शेख जमाजुदिनले प्रधानाध्याक अफरोजले विद्यालयको सम्पूर्ण रजिस्टर लुकाएर राखेको बताए।
विद्यालयमा पटकपटक अनुगमन गर्दा कुनै रजिस्टर नभेटेको र समिति गठनका लागि २ वर्षदेखि प्रयास गर्दागर्दै केहीदिन अघि ४ जना सदस्य छनोट भए पनि प्रधानाध्यापकको बदमासीले पूर्णता नपाएको उनले प्रस्ट पारे।
समितिलाई पूर्णता दिन आइतबार विद्यालयमा अभिभावक भेला हुँदा प्रधानाध्यापकका परिवारका मानिसहरूले मजीबु रहमान जग्गादाता भएकाले पुनः अध्यक्ष हुनुपर्ने भन्दै होहल्ला गरेपछि भेला नै स्थगित गरिएको वडा अध्यक्ष जमालुदिनको भनाइ छ।
उता नगर शिक्षा संयोजक शिवमंगल साह भने जिम्मेवार व्यक्तिमाथि यस्ता आरोप लाग्नु सामान्य भएको बताउँछन्। आफूहरूले कुनै गलत काम नगरेको उनको दाबी छ।
तर गुजरा नगरपालिकाका मेयर सन्तलाल चौधरीले रहमान प्राविसँगै अन्य कयौँ विद्यालयमा बेथिति देखिनुमा शिक्षा संयोजक शिवमंगल साह नै जिम्मेवार रहेको आरोप लगाए। रहमान प्राविको व्यवस्थापन समिति गठन लगायत अन्य गतिविधिको बारेमा पटकपटक निर्देशन दिँदा शिक्षा संयोजक साह विभिन्न बहाना बनाएर फुत्किने गरेको मेयर चौधरीको भनाइ छ।
विद्यालयका प्रधानाध्यापक अफरोज आलमले विद्यालयमा कुनै अनियमितता नभएको दाबी गरेका छन्। आफूहरूमाथि निराधार आरोप लगाइएको उनको भनाइ छ। (रातोपाटीबाट)
