राजविराज, ११ माघ। पिडरबोनी फुटबल क्लब पिडरबोनी लहान सिरहा सप्तरीको शम्भुनाथ नगरपालिका ८ पोखरीयास्थित खेलमैदानमा सञ्चालित छैठो मेयरकप २०८१ फुटबल प्रतियोगिताको फाइनमा प्रवेश गरेको छ।
प्रतियोगिता अन्तर्गत शुक्रबार सम्पन्न दोश्रो सेमिफाइनलमा त्रियुगा स्पोर्टस क्लब फतेपुर सप्तरीलाई शुन्यका बिरुद्ध तीन गोल अन्तरले पराजित गर्दै लहान सिरहाले फाइनलमा आयोजक सन्यासी युवा क्लब पोखरियासँगको भेट पक्का गरेको हो।
प्रतियोगिताको पहिलो हाफको १५ औं र २२औ मिनेटमा लहान सिरहाका खेलाडीले गोल गरी टिमलाई अग्रता दिलाएको थियो । दोश्रो हाफको २४ औ मिनेटमा लहान सिरहाका खेलाडीले तेश्रो गोल गर्दै टिमको जित सुनिश्चित गरेको थियो ।
शम्भुनाथ नगरपालिकाको सहयोगमा सन्यासी युवा क्लब पोखरिया सप्तरीको संयोजन तथा छैठो मेयरकप २०८१ फुटबल प्रतियोगिता सञ्चालन समितिद्वारा सञ्चालित प्रतियोगिताको फाइनलमा आइतवार लहान सिरहा र आयोजक सन्यासी युवा क्लब पोखरिया आमने सामने हुनेछ।
प्रतियोगिता अन्तर्गत भोली शनिवार उदयपुर महिला टिम र सप्तरीको महिला टिमबीच मैत्रीपुर्ण खेल हुने सन्यासी युवा क्लवका सचिव श्रवण कुमार चौधरीले जानकारी दिए।
सप्तरीसहित सिरहा, महोत्तरी, उदयपुर र मोरङ्गका १० टिमको सहभागिता रहेको सो प्रतियोगिताका बिजेता टिमले नगद ५५ हजार तथा ट्रफि र उपविजेता टिमले नगद ४५ हजार रुपौयाँ तथा कप प्राप्त गर्ने आयोजकले जनाएको छ।
सन्यासी युवा क्लवले गत २०४३ सालदेखि फुटबल प्रतियोगिता सञ्चालन गर्दै आएको छ।
