एसके राय
सिरहा, १० माघ।सिरहाको गोलबजार नगरपालिकाले चिसोबाट प्रभावित विपन्न जेष्ठ नागरिकहरुलाई न्यानो कपडा वितरण गरेको छ। वडा नम्बर ७ ले सामाजिक सुरक्षाका लागि ३ सय १५ जना जेष्ठ नागरिक, एकल महिला, अपाङ्ग, र दलित समुदायका व्यक्तिहरूलाई फाइबर सिरक वितरण गरेको हो।
तराई मधेशमा शितलहरकारण नागरिकको जनजीवन कष्टकर बनेको विषयलाई मध्यनजर गर्दै वडाका नागरिकलाई न्यानो पार्न सिरक वितरणवडा गरीएको वडा अध्यक्ष हरिशरण ठाकुरले जानकारी दिए।
यता नगर प्रमुख श्याम कुमार श्रेष्ठले पनि चिसोबाट जोगाउन नगरपालिकाले जुनसुकै कदम चाल्न तयार रहेको बताए। उनले भने, ‘नागरिकले हामीलाई सेवा गर्नका लागि जिम्मेवारी दिएका छन्, र नागरिकको सेवा नै हाम्रो कर्तव्य हो।’
यस कदमले चिसोबाट पीडित नागरिकहरूलाई राहत प्रदान भएको भन्दै नागरिकहरूले खुशी व्यक्त गरे।
