जनकपुरधाम, ६ माघ। मधेस प्रदेश सरकारको आर्थिक वर्ष २०८१/८२ का लागि ल्याएको बजेटको बुँदा नम्बर १४७ संशोधन गर्न प्रदेशसभामा पेश भएको संकल्प प्रस्ताव बहुमतले पारित भएको छ।
लोकतान्त्रिक समाजवादी पार्टी नेपालकी सांसद रुपा कुमारी यादवले आइतबार बसेको प्रदेशसभा बैठकमा पेश गरेके संकल्प प्रस्तावको पक्षमा ४३ जना र विपक्षमा १६ जनाले मतदान गरेपछि सभामुख रामचन्द्र मण्डलले उक्त प्रस्ताव बहुमतले पारित भएको सदनलाई जानकारी गराएका हुन्।
हाल मधेस प्रदेशसभामा १०६ जना सांसद कायम रहेकोमा बैठकमा ५९ जना उपस्थित भएका थिए।
विगतमा हुने योजना खरिदविक्री रोक्न वर्तमान सतिश सिंह नेतृत्वको सरकारले नै बजेट वक्तव्यमा खुल्ला प्रतिस्पर्धा मार्फत काम गराउने प्रावधान ल्याएका थिए। तर, यस प्रावधानले चालु आर्थिक वर्षको ६ महिनामा मधेश सरकारको काम नै ठप्प भएपछि प्रश्न उठ्ने गरेको छ।
सुरुमा यो बुँदा कार्यान्वयन गराउन दृढ देखिएको जनमत नेतृत्वको सरकार पछाडि हटेर उपभोक्ता समितिबाट काम गराउन बाटो खोल्ने प्रयास गरेको हो।
