आशिष विश्वकर्मा
सिरहा, २८ पुस। सिरहाको नगरहा गाउँपालिका ४ स्थित श्री आधारभुत विद्यालय ललभितियाका शिक्षक उमेश कुमार यादव विगत १५ महिनादेखि तलव सुविधाबाट बञ्चित भएका छन्। गाउँपालिकाले दिएको सरुवा सहमतिभन्दा फरक विद्यालयमा आएको भन्दै गाउँ पलिका अध्यक्ष राम प्रमोद यादवले उनको तलव सुविधा रोक्का गरेको हो।
जिल्लाकै विष्णुपुर गाउँपालिका २ स्थित जनता माध्यमिक विद्यालय राजपुरबाट २०८० साउन २८ गते आफ्नै गाउँकै आधारभुत विद्यालयमा हाजिर भएको शिक्षक यादवले जानकारी दिए। पालिकाले २०८० के साउन, भदौ, असोज र दशैं भद्दासमेत खुवाएपनि त्यसपछि तलव भत्ता नपाएको सुनाए। उनले भने, ‘मैले सरुवा भएर आएको मितिले तीन महिनाको तलव भत्ता पाएँ, मेरो सञ्चयकोष जम्मा भएको छ। तर, पछिल्लो १५ महिनाबाट म तलव सुविधाबाट बञ्चित भएको छु।’
लामो समयदेखि तलव नआउँदा आफ्नो आर्थिक अवस्था डामाडोल भएको शिक्षक यादवले सुनाए। उनले भने, ‘कुनै पनि कर्मचारीले १५ महिनादेखि तलवभत्ता पाईरहेको छैन भने के अवस्था हुन्छ? तपाई आफै अन्दाज लगाउन सक्नु हुन्छ।’
शिक्षक यादवले भने, ‘मलाई अध्यक्ष आफैले तलव नदिन रोकेको भन्ने थाहा छ। तर किन नदिएको भन्ने अझै बुझ्न सकेको छुईन्।’
नगरहा गाउँपालिका अध्यक्ष रामप्रमोद यादवले पहिला उमेश आफ्नो पालिकाको कुनै विद्यालयको शिक्षक नै होइन किन तलव दिने? भन्दै हामीसँग नै प्रति प्रश्न गरे। त्यसपछि अध्यक्ष यादवले भने, ‘शिक्षककै निवेदनको आधारमा वडा नम्वर ४ मै रहेको जनता वनवाली माध्यमिक (प्राविधिक)विद्यालय वर्छवाको लागि सहमति दिएका थियांै, उसले आफ्नो मर्जिले अर्को विद्यालयमा सरुवा लिएर आएको छ। मैले सहमति नदिएको विद्यालयमा आफ्नो मर्जीले आएको छ मैले किन तलव खुवाउने?’
उनले थपे मैले जानकारी पाएलगतै तत्कालै फिर्ता लान जिल्ला शिक्षा समन्वय इकाइलाइ पत्र लेखिसकेको बताए।
शिक्षक यादवले अहिले आफू रहेको विद्यालयमा शिक्षक अभाव भएकोले शिक्षा विकास तथा समन्वय ईकाईले पठाएको बताए। उनले शिक्षा कार्यालयले पठायो र विद्यालयले पनि मलाई हाजिर गरायो। पालिकाले ३ महिनाको तलव भत्ता पनि खुवाई सकेको छ। अहिले आएर मलाई फिर्ता पठाउने कुरा गर्नु उचित नभएको बताए।
शिक्षक उमेश यादवले थपे, ‘आजपनि मैले प्रमाणित गरेको कागजातको आधारमा विद्यालयमा कार्यरत १ जना शिक्ष, २ जना बालविकासका सहयोगी कार्यकर्ता र एक जना कार्यालय सहयोगीको तलवभत्ता, पाठ्यपुस्त, दिवाखाजाको रकम गईरहेका छ म भने सेवा सुविधाबाट पञ्चित हुनु परेको छ।’
यस सम्वन्धमा गाउँपालिका प्रमुख प्रशासकीय अधिकृत दुखी कापरको कार्यालयको फोन नम्वर ९८५२८२५२०५मा पछिल्लो तीनदिनदेखि पटक पटक फोन सम्पर्क गर्दा स्विच अफ बताईरह्यो। उनको अर्को नम्वरमा फोन गर्दा पनि उनी सम्पर्कमा आउन चाहेनन्।
