सर्लाही, २० कात्तिक। सर्लाहीको ईश्वरपुर नगरपालिका २ मियाँखोरस्थित पोखरीमा कारसहित बेपत्ता दुईको शव फेला परेको छ। सशस्त्र प्रहरीका गोताखोरले ईश्वरपुर नगरपालिका २, भक्तिपुर मियाँखोरमा पोखरीमा खसेको लु २ च ६७५८ नम्बरको कारका चालक महोत्तरी गौशाला नगरपालिका २ का ३७ वर्षीय सुरेश महतो र कारमा सवार सोनमा गाउँपालिका ८ का ३७ वर्षीय रामाकान्त ठाकुर शव फेला पारेको हो।
सर्लाहीको बयलवासबाट महोत्तरीको गौशाला जाँदै गरेको अवस्थामा कार अनियन्त्रित भई मङ्गलबार बिहान सर्लाहीकै ईश्वरपुर नगरपालिका २ मियाँखोरस्थित पोखरीमा डुबेको थियो।
कारमा सवार अर्का व्यक्ति महोत्तरीको गौशाला २ का ३१ वर्षीय जनक यादव पौडिएर बाहिर निस्कन सफल भएका थिए। उनैले गाउँमा खवर गरेपछि प्रहरी टोलि पुगेर खोजिकार्य सुरु गरेका थिए। प्रहरीले घटनाबारे थप अनुसन्धान भईरहेको जनाएको छ।
