सर्लाही, २० कात्तिक। सर्लाहीको एक पाखरीमा कार खस्दा चालकसहित दुई जना वेपत्ता भएका छन्। ईश्वरपुर नगरपालिका २, भक्तिपुर मियाँखोरमा पोखरीमा मङ्गलबार बिहानी लु २ च ६७५८ नम्बरको कार खस्दा चालक महोत्तरी गौशाला नगरपालिका २ का ३७ वर्षीय सुरेश महतो र कारमा सवार सोनमा गाउँपालिका ८ का ३७ वर्षीय रामाकान्त ठाकुर बेपत्ता भएका हुन्।
मियाँखोरस्थित सडक छेउमा रहेको सरस्वती माध्यमिक विद्यालयको पोखरीमा बयलवासबाट महोत्तरीको गौशालातर्फ गइरहेको अवस्थामा कार अनियन्त्रित भई खस्न पुगेको कारमा सवार गौशाला नगरपालिका २, का ३१ वर्षीय जनक यादवले जनाएको छ। उनी भने सकुशल बाहिर निस्कन सफल हुनुभएको प्रहरीको भनाई रहेको छ।
कारसहित पोखरीमा डुबेर बेपत्ता दुई जनाको नेपाल प्रहरी र सशस्त्र प्रहरीको टोलीले खोजी गरिरहेको छ। महोत्तरीको बर्दिबासस्थित सशस्त्र प्रहरी बलको छिन्नमस्ता बाहिनीबाट गोताखोर टोली समेत भर्खरै घटनास्थलमा आइपुगेको छ।
