रौतहट ३१ साउन। रौतहटको सदरमुकाम गौरमा पेटमा धारीलो हतियार प्रहार गरी हत्या गरिएको अवस्थामा एक वृद्धको शव फेला परेको छ। गौर नगरपालिका ५ कोईरी टोलका ७४ बर्षीय अनुरुद्ध महतोको पेटमा धारीलो हतियार प्रहार गरी हत्या गरिएको अवस्थामा घरदेखि दुई सय मिटर पर खेतमा आज विहान शव फेला परेको हो।
खाना खाएर घरमा सुतेका महतोको शव घर देखि २०० मीटर पर धान खेतमा भेटिएको जिल्ला प्रहरी कार्यालय रौटतहटका सूचना अधिकारी डीएसपी एलिजा गिरीले जानकारी दिए।
स्थानीयले शव देखेपछि प्रहरीलाई खबर गरेका थिए। घटनाको खबर लगत्तै जिल्ला प्रहरी प्रमुख एसपी दिलीप घिमिरे सहितको टोली घटनास्थल पुगेर अनुसन्धान सुरु गरेको गरेको छ।
गौर स्थित झुलेंगेपुलको दक्षिण पट्टी धानको खेतमा भेटिएको मृतक अनुरूद्ध महतोको पेटमा धारिलो हतियार प्रयोग भएको देखिएको एसपी घिमिरेले बताएका छन्।
मृतक महतो लागूऔषध गाँजा प्रयोग गर्ने मानिस भएकाले घटना गर्ने लागू औषध प्रयोगकर्ता हुनसक्ने प्रहरीको प्रारम्भिक अनुमान रहेको छ। मृतकको शव पोष्टमार्टमका लागि प्रादेशिक अस्पताल गौरमा पठाईएको छ।
