वीरगञ्ज २० चैत। हुण्डी कारोबारमा संलग्न भएको आरोपमा बारा प्रहरीले दुई जनालाई पक्राउ गरी सार्वजनिक गरेको छ। पक्राउ पर्नेमा पर्साको पोखरिया नगरपालिका १ बनकटवाका वर्ष ३४ वर्षिय हरिकिशोर पटेल र बारा महागढीमाई नगरपालिका १ का ४२ वर्षका रमेशप्रसाद कुसवाहा रहेका छन्।
भारतबाट स्रोत नखुलेको १३ लाख ५० हजार नेपाली लिएर आइरहेको सूचना पाएपछि जिल्ला प्रहरी कार्यालय बाराबाट खटिएको प्रहरीले विश्रामपुर गाउँपालिका ४ मुसहर्वास्थित सडकबाट नगद सहित पटेललाई पक्राउ गरेको जिल्ला प्रहरी कार्यालयका सूचना अधिकारी डीएसपी दधीराम न्यौपानेले जानकरी दिए।
पटेल सवार प्र २–०३–०१६ प २३३७ नम्बरको मोटरसाइकल बरामद गरिएको छ। पटेलको बयानका आधारमा आरके मनी चेन्जर बरियारपुरका सञ्चालक रमेश कुसवाहा पक्राउ परेका हुन् । बरामद भएको पैसा कुसवाहाको रहेको बताइएको छ।
पक्राउ परेका व्यक्तिले पछिल्लो दुई दिनमा करिब आठ करोड रकम हुण्डी कारोबारमार्फत नेपाल भित्र्याएको अनुसन्धानमा देखिएको प्रहरीले जानाएको छ। पक्राउ परेका दुई जनालाई जिल्ला अदालत बाराबाट म्याद थप गरी प्रहरीले अनुसन्धान सुरु गरेको छ।
