टिपरको ठक्करबाट सुमोमा सवार ३ जनाको मृत्यु ,२ जना घाइते

विराटनगर, १८ फागुन। मोरङको बेलबारीमा टिपरले ठक्कर दिँदा तीन जनाको मृत्यु भएको छ। दुर्घटना दुईजना घाइते भएका छन्।
बेलबारी नगरपालिका ३ स्थित पुरानो मालपोत जाने बाटोमा शुक्रबार बिहान प्रदेश ०२–००१ ख ९६७६ नम्बरका टिपरले मे १ झ २८५६ नम्बरको सुमोलाई ठक्कर दिँदा तीन जनाको ज्यान गएको हो।

दुर्घटना परी सुमोमा सवार झापाको कमल गाउँपालिका २ का ५२ वर्षीय यदुकान्त भट्टराई, कमल गाउँपालिका ४ की ४४ वर्षीया दीपा खानाल र बिर्तामोड नगरपालिका २ का ३६ वर्षीय कृष्ण गजुरेलको मृत्यु भएको प्रहरीले जनाएको छ। सुमोमा ५ जना सबार थिए।

दुर्घटना गम्भीर घाइते भएकामध्ये यदुकान्त र दीपाको विराटनगरस्थित कोशी अस्पताल तथा कृष्णको विराटनगरकै न्युरो अस्पतालमा मृत्यु भएको हो।

पूर्वबाट पश्चिम गइरहेको सुमो गाडीलाई ओभरट्याग गर्नेक्रममा टिपरले ठक्कर दिएको प्रहरीले जनाएको छ।

सुमोलाइ ठक्कर दिएपछि टिपरले प्रदेश ३ क ००१ ख २७१८ नम्बरको बसमासमेत ठक्कर दिएको थियो। घाइते दुई जनाको विराटनगरका विभिन्न अस्पतालमा उपचार भइरहेको प्रहरीले जनाएको छ।