काठमाडौं, १२ माघ। त्रिभुवन अन्तर्राष्ट्रिय विमानस्थल, अध्यागमन कार्यालयमा अध्यागमनका कर्मचारी र प्रहरीबीच भएको घटनाका सम्बन्धमा गृह मन्त्रालयले गम्भीर ध्यानाकर्षण भएको जनाएको छ।
मन्त्रालयका प्रवक्ता नारायणप्रसाद भट्टराईले आज एक वक्तव्य जारी गर्दै घटनाको आवश्यक छानविन गरी तीन दिनभित्र प्रतिवेदन पेश गर्न तीन सदस्यीय छानबिन समिति गठन गरिएको जनाएका छन्।
मन्त्रालयका सहसचिव थानेश्वर गौतमको संयोजकत्वमा गठित समितिमा नेपाल प्रहरीका प्रहरी नायब महानिरीक्षक राजेशनाथ बास्तोला र सीमा तथा अध्यामन प्रशासन शाखाका उपसचिव कुल बहादुर जिसी सदस्य रहेका छन्।
अध्यागमन कार्यालयका प्रमुख र कर्मचारीमाथि प्रहरीले हातपात गरेको घटना सार्वजनिक भएपछि त्यसको सत्यदथ्य सार्वजनिक गर्न मन्त्रालयले समिति गठन गरेको हो।
