सिरहा, १३ मंसिर। सिरहा प्रहरीले बञ्चरो प्रहार गरी बुहारीको हत्या गरी फरार रहेको आरोपमा कल्याणपुर नगरपालिका ८ बडकी मझाउ टोलका ५१ वर्षीय रामअशिष दासलाई हिजो मंगलबार पक्राउ गरेको छ।
घरायसी विवादमा राजकिशोर दासकी श्रीमती संगिताकुमारी दासको गत २७ कात्तिकमा हत्या गरेको आरोपमा प्रहरीले मृतकका ससुरा ५१ वर्षीय रामअशिष दासलाई पक्राउ पछि सार्वजनिक गरेको हो।
प्रहरीका अनुसार छोरा मेला हेर्न गएका बेला घरायसी विवादको क्रममा बुहारीको टाउकोमा बञ्चरो प्रहार गर्दा संगिताको घटनास्थलमै मृत्यु भएको थियो। बुहारीको मृत्यु भएपछि फरार रहेका आरोपी दासलाई १२ मंसिरहामा पक्राउ गरिएको जिल्ला प्रहरी कार्यालय सिरहाले जनाएको छ।
बुहारीको हत्यापछि लुकीछिपी बस्दै आएका दासलाई इलाका प्रहरी कार्यालय मिर्चैया र मातहतको कल्याणपुर प्रहारीको संयुक्त टोलीले खोजतलासको क्रममा १२ मंसिरमा पक्राउ गरेको हो।
सिरहा जिल्ला अदालतबाट १२ मंसिरमा पक्राउ पूर्जी जारी गरिएका दासलाई त्यही दिन पक्राउ गरिएपछि मिर्चैया प्रहरीमा राखेर थप अनुसन्धान गरिरहेको प्रहरीले जनाएको छ।
