जनकपुर, २३ फागुन। धनुषामा मोटरसाईकल दुर्घटनामा परी दुईजनाको मृत्यु भएको छ। पूर्वपश्चिम राजमार्ग अन्तर्गत मिथिला नगरपालिका १०, लालगढमा मोटरसाइकल दुर्घटना हुँदा दुई जनाको मृत्यु भएको हो।
इलाका प्रहरी कार्यालय ढल्केबरका प्रहरी नायव निरीक्षक ईश्वरविक्रम शाहले दुर्घटनामा मोटरसाइकल चालक धनुषाको बटेश्वर गाउँपालिका १, विजयपुरका ४० वर्षीय विनोद महतो र पहिचान खुल्न नसकेको एक पुरुषको मृत्यु भएको बताए।
सोमबार राती ११ बजे महोत्तरीको बर्दिबासबाट ढल्केवरतर्फ आउँदै गरेको प्रदेश २–००२–०३ प ७७४३ नम्बरको मोटरसाइकलले सडकमा हिँडिरहेको पहिचान खुल्न नसकेका व्यक्तिलाई ठक्कर दिएको थियो। ठक्करबाट सख्त घाइते भएका दुवै जनाको उपचारको क्रममा जनकपुरस्थित प्रादेशिक अस्पतालमा राती नै मृत्यु भएको प्रहरी नायब निरीक्षक शाहले बताए।
दुवै जनाको शव पोस्टमार्टमका लागि प्रादेशिक अस्पताल जनकपुरमा राखिएको र घटनाका विषयमा थप अनुसन्धान भइरहेको प्रहरीले जानकारी दिए।
