सप्तरी, ३ फागुन। सप्तरी प्रहरीले आफ्नै बुवाको हत्या गरी फरार रहेको आरोपमा छोरालाई पक्राउ परेका छन्। हनुमाननगर कंकालिनी नगरपालिका १४ का ६५ वर्षीय जगदिश रामको हत्या गरी फरार रहेका ३५ वर्षीय छोरा देवकुमार राम पक्राउ परेका हुन्।
घटनापछि फरार रहेका आरोपित पछिल्लो समय गाउँघरमा नै लुकीछिपी बस्दै आएका भन्ने जानकारी पछि पक्राउ गरिएको जिल्ला प्रहरी कार्यालय सप्तरीका सूचना अधिकारी डीएसपी नरेश कुमार सिंहले बताए।
आफ्नै घरमा बसिरहेका बेला २०७६ बैशाख २१ गते राति देवकुमारले घरायसी विवादमा बुवाको हत्या गरेका थिए। जग्गा जमिनका विषयमा बुवाछोराबीच विवाद रहेको थियो। घटनापछि मृतककी जेठी बुहारी ३० वर्षीया सुनीतादेबी रामले जिल्ला प्रहरी कार्यालय सप्तरीमा उजुरी दिएकी थिइन्।
जिल्ला प्रहरी कार्यालयले घटनाको भोलिपल्टै उजुरी दर्ता गरेपनि आरोपित ३ वर्षदेखि फरार रहेका थिए।
