राजविराज, ३ माघ। सप्तरीको शम्भुनाथ नगरपालिका ८ पोखरीयास्थित खेलमैदानमा सञ्चालित चौथो मेयरकप २०७९ फुटबल प्रतियोगितामा नमो बुध्द फुटबल टिम मझौ सप्तरी फाईनलमा प्रवेश गरेको छ। प्रतियोगिता अन्तर्गत मंगलवार सम्पन्न खेलमा त्रियुगा स्पोर्टस क्लब फतेपुर सप्तरीलाई शुन्यका बिरुद्ध एक गोल अन्तरले पाखा लगाउँदै मझौले फाइनलको यात्रा तय गरेको हो।
अत्यन्तै प्रतिष्पर्धात्मक खेलको दोश्रो हाफको २१ औं मिनेटमा मझौका कृपा चौधरीले गोल गर्दै टिमलाई जित दिलाएको हो। प्रतियोगिता अन्तर्गत भोली बुधवार हुने दोश्रो सेमिफाइनलमा तालतलैया फुटबल टिम सुनसरी र बिभागीय टोली एपीएफ बर्दिबासले प्रतिष्पर्धा गर्ने संयासी युवा क्लवका सचिव श्रवण कुमार चौधरीले जानकारी दिए।
शम्भुनाथ नगरपालिकाको सहयोगमा संयासी युवा क्लब पोखरीया द्वारा सञ्चालित प्रतियोगितामा सप्तरी, सिरहा, महोत्तरी, उदयपुरका बिभिन्न १२ क्लबको सहभागिता रहेको छ। प्रतियोगिता माघ ६ गतेसम्म चल्ने प्रतियोगिताका बिजेताले नगद ५५ हजार तथा ट्रफि र उपविजेताले नगद ४५ हजार रुपैयाँ प्राप्त गर्नेछ।
संयासी युवा क्लवले गत २०४३ सालदेखि फुटबल प्रतियोगिता सञ्चालन गर्दै औंएको छ।
