सिरहको गोलबजार एससी ‘सी’ डिभिजन लिग फुटबलमा छानिए

सिरहा २८ कात्तिक। सिरहाको गोलबजार एससी यस वर्ष हुने शहिद स्मारक ‘सी’ डिभिजन लिग फुटबल प्रतियोगिताका लागि छनौट भएको छ। ललितपुरको सातदोबाटोस्थित एन्फको खेल मैदानमा सोमबार भएको नकआउट चरण अन्तर्गत समूह १ को अन्तिम खेलमा मसुरिया फुटबल ऐकेडेमीलाई ट्राइबेकरमा पराजित गर्दै ‘सी’ डिभिजन लिगमा छनौट भएको हो।

निर्धारित समयको खेल २–२ गोलको बराबरीाम सकिएपछि खेलको नजिता निर्धारण ट्राइबेकरमार्फत गरिएको थियो। यसअघि खेलको शुरुवाती चौंथो मिनटमा सिद्धान्त खड्कीले गोल गर्दै गोलबजारलाई खेलमा पहिलो अग्रता दिलाएका थिए।

७ औं मिनटमा मसुरियाका निर्जल धामीले गोल गर्दै खेललाई १–१ को स्थितमा ल्याएका थिए। ४३ औं मिनटमा मसुरियाको तर्फबाट आत्मघाती गोल भएपछि पहिलो हाफमा गोलबजार २–० ले अघि रहेको थियो।

त्यसपछि ७० औं मिनटमा निर्जलले गोल गरेपछि पहिलो हाफको खेल २–२ गोलको बराबरीमा सकिएको थियो। यससँगै समूह १ बाट गोलबजार ‘सी’ डिभिजन लिगमा छनौट हुन सफल भएको हो।

एन्फाले यस वर्षको ‘सी’ डिभिजन लिग छनौटमा सहभागि ६० क्लबलाई २० समूहमा विभाजन गरेको थियो। जसअन्तर्गत प्रत्येक समूहमा ३ क्लब परेका परेका थिए।

समूह चरणको खेलबाट प्रत्येक समूहको विजेता टोलीले नकआउट चरणमा स्थान बनाएका थिए। नकआउट चरणमा प्रवेश गरेका २० टोलीलाई पनि २ समूहमा विभाजन गरिएको थियो।

नकआउट चरणपछि दुई समूहका विजेता क्लब ‘सी’ डिभिजन लिगमा छनोट हुने नियम रहेको छ । सोहि नियम अनुरुप समूह १ को विजेता बन्दै गोलबजार सी डिभिजन लिगमा छनौट भएको हो।

समूह २ अन्तर्गत नकआउट चरणको अन्तिम खेल मंगलबार हुनेछ। मंगलबारको खेलपछि सी डिभिजन लिगमा छनौट हुने दोश्रो टोलीको टुङ्गो लाग्ने छ।