बर्दिवास, ८ वैशाख । महोत्तरीको बर्दिबासबाट प्रहरीले स्वचालित पेस्तोल सहित एक युवकलाई नियन्त्रणमा लिएको छ । वर्दिवास नगरपालिका १३ बिजलपुरा डाँडाटोलका २८ वर्षीय लालबाबु भण्डारीलाई १ थान पेस्तोल, १ थान मिसफायर भएको गोली सहित बुधबार साँझ पक्राउ गरेको हो ।
भण्डारीले पेस्तोल लिई बिबाहको गाडी तोडफोड गरेको भन्ने खबर प्राप्त हुनासाथ प्रहरी चौकी औरही र प्रहरी चौकी हात्तिलेटबाट खटिएको घटनास्थल पुगेका थिए । त्यहाँ पुगेका प्रहरीमाथि लक्षित गरी भण्डारीले फायर गर्दा मिसफायर भएपछि तत्काल भण्डारीलाई उक्त हतियार सहित पक्राउ गरेको महोत्तरी प्रहरीले जनाएको छ ।
त्यसैगरी, सिन्धुलीको दुधौली नगरपालिका ११ श्रीपुर गाउँका ४५ वर्षीय दिल बहादुर राईको घरबाट १ थान भरुवा बन्दुक प्रहरीले बरामद गरेको छ । प्रहरी चौकी दुधौलीबाट खटिएको प्रहरीले राईको घरमा लोड गरी राखेको अवस्थामा उक्त बन्दुक फेला पारी बरामद गरेको हो ।
हाल फरार राईको प्रहरीले खोजी गरिरहेको छ । घटना सम्बन्धमा प्रहरीले आवश्यक अनुसन्धान गरिरहेको छ ।
