वीरगञ्ज, ४ बैशाख । जिल्ला फुटबल संघ बाराको कार्यसमिति चयनमा विवाद सृजना भएको छ । शनिवार कार्यसमिति चयन गर्न बसेको बैठकले सर्वसहमतिबाट टुंगो लगाउने लगभग पक्कापक्की भइसक्दा पनि अन्तिममा बैठक स्थगित गर्नु परेको जिल्ला फुटबल संघ बाराका अध्यक्ष महमद सैमुल्लाहले जानकारी दिए ।
उनले भने, ‘शुरुमा सर्व सहमतिबाट चयन गर्ने तयारी थियो, अन्तिममा केही गृहकार्य पुगेन । अनि समय पनि नभएपछि स्थगित गरेका छौँ ।’ सैमुल्लाहका अनुसार जिल्ला फुटबल संघको बैठक छिटै बोलाएर कार्य समिती सर्व सहमतिमै गरिने योजना छ ।
यद्यपी संघको अध्यक्षका आकांक्षीहरु कृष्णमोहन चौधरी र रामचन्द्र लामाले अडान नछोडेपछि निर्वाचनमै धकेलिन सक्ने संकेत देखिएको छ । केन्द्रको लागि मताधिकार दिनुपर्ने सैमुल्लाहले माग राखेपछि कुरा बाँझिएको मानदेव हजराले बताए । जिल्ला फुटबल संघहरुमा पनि केन्द्रिय समितिको विवादको बाछिटा परेको अन्य फुटबल प्रेमीहरुले आभाष गरीरहेका छन् ।
त्यही विवादको परिणाम बारामा सहमति हुन नसकेको भएपनि पदाधिकारीले भने अस्किार गरेर गृहकार्य नपुगेको स्पष्टोक्ति दिएका छन् । अध्यक्ष सैमुल्लाहले विवाद नगरेर फुटबलको बिकास र फुटबल खेलाडीको क्षमता अभिवृद्धि गर्नुपर्ने कुरा मुख्य विषय भएो बताएका छन् ।
