वीरगञ्ज, १७ फागुन । भोजपुरी कलाकार खेसारीलाल यादवमाथि रौतहटमा पुनः ढुङ्गा प्रहार भएको छ । रौतहटको मौलापुर नगरपालिका ५ पतौरास्थित महादेव मन्दिरमा महाशिवरात्रीको अवसरमा आयोजित ‘मधानी महायज्ञ’ मा प्रस्तुती दिन आएका कलाकार यादवमाथि ढुङ्गा प्रहार भएको हो ।
उनले गीत गाएर प्रस्तुती दिने क्रममा ढुङ्गा प्रहार भएपछि गाउँदै गरेको गीत रोकेर उनले सम्झाएका थिए । यादवले भने, ‘एकछिन शान्त भएर बस्न सक्नुहुँदैन ?’ यसअघि सुनसरीको बर्जु गाउँ पालिकामा आयोजित महोत्सवमा पनि उनको सवारी आगजनी गरिएको थियो ।
आफ्नै छोरा जस्तै माया गर्ने दर्शक श्रोताहरुको मायाका कारण आफुले दोस्रो पटक आँट गरेर कार्यक्रममा उपस्थित भएको बताउँदै कलाकार यादवले १÷२ जनाको उच्छृङ्खल गतिविधिका कारण पुरा नेपाल देश नै बदनाम हुन सक्ने बताए ।
उनी भने, ‘पहिलो पटकको त्यति ठूलो घटनापछि पनि म पुनः आएको छु । मलाई माया गर्नुको सट्टा ढुङ्गा÷ईट्टा प्रहार गर्नुहुन्छ ।’ १ दिनमा ५ करोड दर्शक÷श्रोताहरुले युट्युबसहितका विभिन्न माध्यमबाट हेर्ने भएकाले यसले गर्दा तपाई र तपाईको समाज नै खराब हुने यादवको भनाई छ ।
सङ्कुचित मानसिकताका कारण गरिएको व्यावहारका कारण फेरी अर्काे पटक नेपाल आउने बाटो बन्द गर्नुपर्ने अवस्थाको सृजना नगर्न पनि उनले सचेत गराए । आफु मात्रै नभएर दुनियाँका कोही पनि कलाकार नेपाल नआउने उनले बताए ।
उनी थपे, ‘म छोरा भएको नाताले नेपालको धर्तीमा आएको हुँ । म दुश्मन हैन । दुश्मनले मनोरञ्जन गराउँदैन । मायाँ गर्नुहोस्, मायाँ लिनुहोस् ।’ फेरी यस्तो व्यावहार नदोहोरिने आशा गर्दै कलाकार यादवले आफ्नो प्रस्तुतीलाई निरन्तरता दिए । यद्यपी उनलाई लक्षित गरेर गरिएको ढुङ्गा प्रहारबाट भने उनी बच्न सफल भएका छन् ।
