बारा, ३ माध । बारा प्रहरीले ९ वर्षीया बालिकालाई जबरजस्ती करणी गरी हत्या गरेको अभियोगमा दुई जनालाई पक्राउ गरेको छ । जवरजस्ती करणीगरी बालिका हत्या अभियोगमा प्रहरीले आदर्शकोतबाल गाउँपालिका ८ कोतवालीका २० वर्षीय संतोष साह कानु र सोही ठाउँ बस्ने ४० वर्षीया शान्ति देवीलाई नियन्त्रणमा लिएको हो ।
गत पुस २५ गते दिउँसोको समयमा घरबाट बाख्रा लिई चराउन गएकी ती बालिका हराई बेपत्ता भएपनि पुस २७ गते दिउँसो आदर्शकोतवाल गाउँपालिका ७ स्थित जमुनी खोलामा उनको शव फेला परेको थियो ।
शव फेला परेको सूचना प्राप्त हुनासाथ तत्काल जिल्ला प्रहरी कार्यालय बारा तथा २ नम्बर प्रदेश प्रहरी कार्यालयबाट खटिएको प्रहरीले अनुसन्धान गर्ने क्रममा बालिकाको जबरजस्ती करणी पछि हत्या गरी फालेको खुल्न आएको बताइएको छ । प्रहरीले घटनामा संलग्न संतोष साह र अपराध पुष्टी हुने दशीहरू लोप गर्ने प्रयास गरेकी शान्ती देवीलाई पक्राउ गरेको बताएको छ ।
उनीहरु उपर ज्यान सम्बन्धी कसूरमा जिल्ला अदालत बाराबाट ५ दिन म्याद थप गरी थप अनुसन्धान कार्य भइरहेको जिल्ला प्रहरी कार्यालय बाराले जनाएको छ ।
