वीरगञ्ज, २४ पुस। पर्साको जगरनाथपुर गाउँपालिका ६ सन्ठीमा गम्छाले घाँटी वेरिएको अवस्थामा एक बालकको शव भेटिएको छ । चार दिन अघिदेखि हराईरहेका स्थानीय नागेश्वर पटेलका १२ वर्षीय छोरा मन्टु गाउँ देखि पूवतर्फ उखुाखेतमा मृत भेटिएको हो।
उखु खेतमा घाँस काट्न गएकी महिलाले बालकको शव देखेपछि गाउँमा खबर पुर्याएपछि प्रहरीलाई सूचना दिएका थिए ।
बालकको शव पोस्टमार्टमका लागि वीरगञ्जस्थित नारायणी अस्पतालमा पठाइएको जिल्ला प्रहरी कार्यालय पर्साका सूचना अधिकारी डीएसपी ओम प्रकाश खनालले जानकारी दिए ।
हराईरहेको भएपनि कतै गयो होला आइहाल्छ भनेर अभिभावकले प्रहरीमा खोज तलासका लागि निवेदनसमेत दिएका थिएनन् । बालकको घाँटीमा गम्छा कसिएकोले घटनालाई शंकास्पद भएको भन्दै प्रहरीले अनुसन्धान गरिरहेको छ । प्रहरीले घटनामा संलग्न रहेको आशंकामा चार जनालाई निगरानीमा राखेर अनुसन्धान गरिरहेको बताएको छ ।
