काठमाडौं, २१ पुस । सिरहामा कांग्रेस जिल्ला सभापति रामचन्द्र यादवलाई ‘गोली हान्ने धम्की दिएका’ एसपी हीराबहादुर पाण्डेलाई पदबाट निलम्बन गरिएको छ।
६ महिनाअघि मात्र सिरहा प्रहरी प्रमुखकाे जिम्मेवारी पाएका एसपी पाण्डेलाई ३ दिनअगाडि प्रहरी प्रधान कार्यालयले हेडक्वार्टर सरुवा गरेकाे छ। यसकाे दाेष कांग्रेसका सिरहा जिल्ला सभापति यादवलाई लगाउँदै एसपी पाण्डेले घरमै गएर गाेली हानेर मार्ने धम्की दिएका थिए।
एसपी पाण्डेले भने आफूले कानुनबमाेजिम काम गर्दा विवाद झिकिएकाे दाबी गरेका छन्।
एसपी पाण्डे यसअघि जनमत पार्टीका अध्यक्ष सीके राउतसँग पनि विवादमा परेका थिए। उनलाई राउतले जनकारबाही गर्ने धम्कीसमेत दिएका थिए।
सिरहा प्रहरी प्रमुखको जिम्मेवारी भने एसपी अर्जुन तिमल्सिनालाई दिइएको छ।
