रौतहट २८ कात्तिक । डिभिजन बन कार्यालय रौतहटले सखुवाको काठ सहित ट्याक्टर बरामद गरेको छ । गुजरा नगरपालिका ४ सेमरी दोमुहान खोला किनारबाट आज बिहान बालुवा मुनि राखिएको काठ सहित ना ५ त ७६९४ नम्बरको ट्याक्टर नियन्त्रणमा लिएको हो ।
सशस्त्र प्रहरी र बन सुरक्षा गस्तीको संयुक्त टोलिले तस्करले बालुवा मुनि लुकाएर राखेको अबैध काठ सहितको ट्याक्टर बरामद गरेको डिएफओ अमरदेव यादवले जानकारी दिए ।
बिशेष सूचनाको आधारमा सेक्टर बन कार्यालय जंगलसहियाका प्रमुख रामदेव चौधरीको टोलिले माथी बालुवा लोड गर्ने क्रममा उक्त ट्याक्टर नियन्त्रणमा लिएको डिभिजन बन रौतहटका प्रमुख अमरदेव यादवले बताए ।
ट्याक्टरमा सखुवा जातको काठको चिरान ४० थान र १ थान ५ क्युफिट लम्बाई गोलिया काठ बरामद भएको प्रमुख यादवले बताए । संयुक्त सुरक्षा गस्ती टोलिलाई देखेपछि ट्याक्टर चालक फरार भएको तथा बरामद काठ सहितको ट्याक्टर सेक्टर बन कार्यालय जंगलसहुयाको नियन्त्रणमा राखेर थपअनुसंधान भैरहेको डिभिजन बन कार्यालय रौतहटले जनाएको छ ।
