सप्तरी, १९ कार्तिक । दोस्रो बलान बिहुल मेयर कपको उदघाटन खेल सम्पन्न भएको छ । आज भएको उदघाटन खेलमा सुखिपुरलाई पराजित गर्दै लालपुर बिजयी भएको छ । टस जितेर ब्याटिङ गर्ने निर्णय गरेको लालपुर निर्धारित ओभरमा ८ बिकेट गुमाई ९२ रन बनाएको थियो ।
जवाफमा ९३ रनको बिजयी लक्ष्य लिएर मैदानमा उत्रेका सुखिपुर टिम सम्पुर्ण बिकेट गुमाई मात्र १५ रन बनाई ७७ रनले हार ब्यहोरेको छ । प्रतियोगितामा प्रथम हुनेलाई रु. ३१ हजार नगद र ट्रफी, दोस्रो हुनेलाई रु. २१ हजार नगद र ट्रफीको व्यवस्था गरिएको छ । बलान बिहुल ३ दुधैला क्रिकेट मैदानमा आजदेखी सुरु भएको खेल बलान बिहुल गाउँपालिकाको सहयोग र दुधैला युवा क्लबको आयोजनामा उदघाटन कार्यक्रम सम्पन्न भएको छ ।
क्लबको अध्यक्ष राम नारायण पण्डितको अध्यक्षता तथा गापा अध्यक्ष दयानन्द गोईतको प्रमुख आतिथ्य र वडा ३ का वडा अध्यक्ष कपलेश्वर मण्डलको बिशिष्ठ आतिथ्यतामा कार्यक्रम सम्पन्न भएको छ । कार्यक्रममा नेकपा माओवादी केन्द्रका युवा नेता खेमचन्द्र यादव, नेकपा एमालेका नेता अशोक यादव, कार्यपालिका सदस्य हरी राम लगायत विभिन्न क्षेत्रका व्यक्तिहरुको उल्लेखनीय उपस्थिती रहेको थियो ।
