प्रशिक्षक अल्मुताइरीलाई खेलकुद मन्त्रीको स्वागत

आइतबार मन्त्री गहतराजले मन्त्रालयमा एक कार्यक्रम गर्दै प्रशिक्षक अब्दुल्लाहलाई नेपालमा स्वागत गरेका हुन् । 

नेपाललाई पहिलो पटक साफ च्याम्पियनसिपको फाइनलमा पुर्‍याएका प्रशिक्षक अब्दुल्लाह हिजो (शनिबार) नेपाल झरेका थिए ।बंगलादेशसँग बराबरी खेल्दै २८ वर्षपछि नेपाल फाइनलमा पुग्दा प्रशिक्षक अब्दुल्लाहले  राजीनामा दिएका थिए । सोही दिन उनले नेपालसमेत नजाने बताएका थिए । 

फाइनलमा भारतसँग ३–० गोलअन्तरले पराजित हुँदै पहिलो पटक उपाधि हातपार्न वञ्चित भएको नेपाली टोली स्वदेश फर्कंदा प्रशिक्षक अब्दुल्लाह भने कतार नै बसेका थिए । 

फाइनल लगत्तै पुनः नेपाल फर्कंन तयार रहेको बताएका अब्दुल्लाहले गत १० गते (बुधबार) एन्फासँग आफूले तीन वर्ष रहने निर्णय भएको सामाजिक सञ्जालबाट बताएका थिए । यस विषयमा एन्फाले भने कुनै पनि आधिकारिक धारणा राखेको छैन ।