सिरहा, ११ कात्तिक । बोक्सी आरोपमा दलित महिलालाई कुटपिट गर्ने सिरहाका एक युवकलाई प्रहरीले नियन्त्रणमा लिएको छ । कल्याणपुर नगरपालिका १० पर्चिलवाका ५३ वर्षिय सेमादेवी चमारलाई बोक्सिको आरोपमा कुपिटगरेको आरोपमा प्रहरीले स्थानीय रामविलाश यादवलाई पक्राउ गरेको हो ।
व्यक्तिगत रिसिविका कारण यादवले महिलालाई बोक्सिको आरोप लगाउँदै कुटपिट गरेको जाहेरीको आधारमा यादवलाई कल्याणपुर बजारबाट हिजो बेलुका पक्राउ गरेको इलाका प्रहरी कार्यालय मिर्चैयाका प्रमुख डीएसपी राजेन्द्र श्रेष्ठले जानकारी दिए ।
महिलाले बोक्सीको आरोप लगाई कुटपिट गर्दै अमानवीय अपमानजनक व्यवहार गरेको जाहेरी गत भदौ १७ गते जाहेरी दिएका थिए । त्यही जाहेरीको आधारमा उनलाई खोजतासगर्ने क्रममा पक्राउ गरेको प्रहरीले जनाएको छ ।
उनलाई आजै अदालतमा उपस्थित गराई म्याद थप गरी आवश्यक अनुसन्धान गरिने प्रहरीले बताए ।
