वीरगञ्ज, ८ कार्तिक । जिल्ला प्रहरी कार्यालय पर्साले अवैध लागुऔषधसहित २ जनालाई पक्राउ गरेको छ । सूचना परिचालन र प्रहरी कारवाहीको सिलसिलामा प्रहरी चौकी गणेश टोलबाट खटिएको प्रहरीले वीरगञ्ज महानगरपालिका १६ रजतजयन्ती चोकमा चेकजाँचको क्रममा लागुऔषध बरामद गरेको हो ।
बा.४ च १०२१ नम्बरको कारबाट १ सय मिलिलिटरको विनसिरेक्स २ सय ३७ बोत्तल र नाइट्राभेट ट्याब्लेट ६ सय पिस बरामद गरेको जिल्लाप्रहरी कार्यालय पर्साका सूचना अधिकारी डीएसपी प्रह्लाद कार्कीले जानकारी दिए ।
प्रवक्ता कार्कीका अनुसार लागुऔषधसहित पक्राउ पर्नेमा मकवानपुरको हेटौडा उपमहा नगरपालिका ३ का २६ वर्षीय सुमन न्यौपाने र २८ वर्षीय रोशन लामा रहेका छन् ।
दुवैजनाविरुद्ध लागु औषध सम्बन्धि कसूरमा आवश्यक अनुसन्धान भइरहेको प्रहरी प्रवक्ता कार्कीले बताए ।
