जनकपुर, ५ कात्तिक । धनुषामा एक महिलाको हत्या प्रयासमा सलग्न रहेको आरोपमा एक युवकलाई प्रहरीले पक्राउ गरेको छ । जिल्लाको विदेह नगरपालिका ६ गिद्धाका ५२ वर्षीया जमुना देवीले खुट्टामा लगाएको पाउजु लुट्न हत्याको प्रयास गरेको आरोपमा स्थानीय ३५ वर्षीय रामभजन महतोलाई प्रहरीले पक्राउ गरेको हो ।
शुक्रबार बिहान घाँस काट्न गएका बेला पछ्याउँदै गएका महतोले जमुनको घाँटीमा छुरा रेटेर पायल लुट्ने प्रयास गरेको प्रहरीले जनाएको छ ।
छुरा प्रहारले जमुनको घाँटीमा काटिएर रगत आएको देखेपछि स्थानीयले प्रहरीलाई खवर गर्दै घाइतेलाई उपचारका लागि तत्काल प्रादेशिक अस्पताल जनकपुरमा भर्ना गराएका थिए । अहिले जमुनको स्वास्थ्य खतरामुक्त रहको जनाइएको छ । घटनामा संलग्न महतोलाई नियन्त्रणमा लिई आवश्यक अनुसन्धान थालिएको जिल्ला प्रहरी कार्यालय धनुषाका सूचना अधिकारी डीएसपी जितेन्द्रकुमार बस्नेतले जानकारी दिए ।
प्रहरीले तत्काल सोधपुछगर्दा महतोले जमुनको पाउजु लुट्न हत्याको प्रयास गरेको खुल्न आएको जनाए ।
