चन्डीगढ, १ कार्तिक । भारतको एक अदालतले डेरा सच्चा सौदाका प्रमुख गुरमित राम रहिमसहित पाँच जनालाई आजिवन कारावासको सजाँय सुनाएको छ । करिब २० वर्षअघि आफ्नै अनुयायी रन्जित सिंहको हत्या गरेको अभियोगमा सोमवार अदालतले रहिमसहित पाँच जनालाई आजीवन कारावासको सजाँय सुनाएको हो ।
त्यस्तै, अदालतले रहिमलाई ३१ लाख भारु जरिवानासमेत तोकेको छ ।
सो हत्यामा आरोपित अर्का एक व्यक्तिको भने गत वर्ष नै मृत्यु भएको थियो । यसै महिनाको सुरुमा हरियाणाको विशेष सीबीआई अदालतले पाँचै जनालाई दोषी ठहर गरेको थियो ।
दुई जना अनुयायीलाई बलात्कार गरेको अभियोगमा सन् २०१७ देखि जेलमा रहेका रहिमलाई भिडियो सम्मेलनमार्फत अदालतमा उपस्थित गराइएको थियो भने अन्य चार जना भौतिक रुपमा उपस्थित भएका थिए ।
अदालतको फैसलासँगै हरियाणाको पन्चकुला र सिर्सा क्षेत्रमा सुरक्षा सतर्कता कडा पारिएको छ ।
रहिमका अनुयायीसमेत रहेका रन्जित सिंहको सन् २००२ मा गोली हानी हत्या भएको थियो । रन्जितले राम रहिमले महिलालाई यौन दुव्र्यवहार गर्दै आएको एक पत्रमार्फत खुलासा गरेका थिए ।
