गमक पोष्ट समाचारदाता / बर्दिया, २ असोज । बर्दियामा बँदेललाई मार्न थापेको विद्युतीय थराममा परेर एकै परिवारका तीन जनाको मृत्यु भएको छ ।
बँदेल मार्नका लागि राखेको धरापमा परेर करेन्ट लाग्दा गएराती ठाकुरबाबा–३ का ३२ वर्षका बालकृष्ण थारु, उनकी श्रीमती २९ वर्षकी सुनिता थारु र बालकृष्णकी भाउजु ४३ वर्षकी बेलमती थारुको मृत्यु भएको हो ।
एक जनालाई करेन्ट लागेपछि उनलाई बचाउने क्रममा अरु दुई जनालाई पनि करेन्ट लागेर मृत्यु भएको प्रहरीले जनाएको छ । पासो थाप्ने ८३ वर्षका राजबहादुर शाहीलाई प्रहरीले पक्राउ गरेको छ ।
धान खेतमा बँदेलका लागि थापेको विद्युतीय पासोमा करेन्ट लागेर एक जनाको ज्यान गएको थाहा पाएलगत्तै खेतमा विद्युत् प्रवाह गरेका वृद्ध आफैँले घरपरिवारमा जानकारी गराएका प्रहरीले जनाएको छ । घटनाबारे थप अनुसन्धान भइरहेको इलाका प्रहरी कार्यालय भुरिगाउँका प्रहरी निरीक्षक कविराज रोकायाले बताए ।
धानबालीमा जङ्गली हात्ती, बँदेल लगायतका वन्यजन्तुले क्षति पुर्याउन थालेको भन्दै करेन्ट प्रवाह गर्दा यसअघि करेन्ट लागेर दुई वटा हात्ती र एक जना युवाको मृत्यु भएको थियो ।
