गमक पोष्ट समाचारदाता / लहान, १८ साउन । पूर्वपश्चिम राजमार्ग अन्तर्गत सिरहाको लहान नपा १ बाट प्रहरीले प्रतिवन्धित लागुऔषध सहित एक युवकलाई नियन्त्रणमा लिएको छ । इलाका प्रहरी कार्यालय लहान र जिल्ला ट्राफिक प्रहरीको संयुक्त टोलिले चेकजाँच गर्ने क्रममा सिरहा नवराजपुर गापा ५ का २६ वर्षिय प्रभु नारायण सिंह राजपुतको साथबाट ठूलो परिमाणमा लागुऔषध सहित पक्राउ परेको हो ।
प्रहरीले उनको साथबाट नाईट्राभेट १० लेखिएको ४ हजार ७ सय ४० ट्याबलेट, डाईजीपाम लेखिएको एक सय ९४ एम्पुल, फेनारगन लेखिएको एक सय ९४ एम्पुल, नाम लेवल नभएको एक सय ९४ एम्पुल, डाईलेक्स डि.सी १०० एमएल लेखिएको ७ बोतल र उनी सवार को.२६ प. १८९नं. को मोटरसाइकल नियन्त्रणमा लिएको जिल्ला प्रहरी कार्यालय सिरहाका सूचना अधिकारी सुवाश बुढाथोकीले जानकारी दिए ।
प्रहरीले पक्राउ परेको सिंहलाई हिरासतमा राखेर थप अनुसन्धान गरिरहेको जनाएको छ ।
