गमक पोष्ट समाचारदाता / सिरहा, ९ जेष्ठ । सिरहा प्रहरीले पेस्तोलसहित तीन जना युवकलाई नियन्त्रणमा लिएका छन् । चोरी, डकैती तथा लुटपाटमा संलग्न रहेको आशंकामा प्रहरीले लहान १ मटियर्वाका २५ वर्षिय करण पूर्वेको घरमा छापामार्दा उनको घरबाट एक थान पेष्टोल, त्यसमा लाग्ने गोली र २२ वर्षिय संजय कुमार महतो र २४ वर्षिय धर्मेन्द्र महतोलाई नियन्त्रणमा लिएको हो ।
गत वैशाख २८ गते लहान नगरपालिका १ कृष्णटोलका इन्द्रदेव ठाकुरको घरबाट नगद र सुनचाँदीका गरगहना लुटपाट गरेको आशंकामा उनीहरुको घरमा खोज तलाश गर्ने क्रममा पेस्तोल बरामद भएको जिल्ला प्रहरी कार्यालय सिरहाले जनाएको छ ।
प्रहरीले कटुवा पेस्तोल १ थान र ७.६२ एमएम एमएफएस लेखिएको गोली एक थान बरामद भएको जिल्ला प्रहरी कार्यालय सिरहाका प्रवक्ता एवम् डिएसी शालिग्राम शर्माले बताए ।
ईन्द्रदेव ठाकुरको घरमाभएको डकैती घटनामा अनुसंधान गर्नेक्रममा पूर्वेको घरमा खोजतलाश गर्दा कटुवा पेस्तोल, गोली समेत बरामद भएपछि तीनै जनालाई पक्राउ गरिएको प्रवक्ता शर्माले बताए । पक्राउ गरिएका तीनै जनालाई ईलाका प्रहरी कार्यालय लहानमा राखेर थप अनुसंधान गरिरहेको प्रहरीको भनाई रहेको छ ।
