फाईल फोटो।
सिरहा, २१ फागुन। आगामी चैत्र ७ गतेबाट हुन गईरहेको माध्यमिक शिक्षा परीक्षा २०८१ को लागि सिरहामा आर्थिक लेनदेनमा निजी विद्यालयका परीक्षा केन्द्रहरु निर्धारण गरेको रहस्य बाहिरीएको छ। शिक्षा विकास तथा समन्वय ईकाईका कर्मचारी र निजी विद्यालयका संस्थापकबीच परीक्षा केन्द्र निर्धारणका लागि अझै बार्गेनिङ हुनेगरेको फोन रेकर्ड बाहिरीएपछि रहस्य उद्घाटित भएको हो।
एक निजी विद्यालयका संस्थापक र ईकाईका कर्मचारीविच भएको फोन बार्ताले उनीहरुको परीक्षा केन्द्र निर्धारणमा आर्थिक चलखेल भएको प्रष्ट हुन्छ। अडियोमा इकाई कर्मचारीले ‘अरु कुरो भेटेरै गरौंला, तपाईंको लेखासँग कुरो भइसककेको छ। तपाईंले चाहेकै ठाउँमा केन्द्र पर्छ तपाईं ढक्क हुनुहोस्।’
यो भनाईले परीक्षा केन्द्र निर्धारण प्रक्रियामा आर्थिक चलखेल भएको संकेत गर्छ। स्रोतका अनुसार शिक्षा इकाइ र केही निजी विद्यालयले ठूलो रकमको चलखेलमा परीक्षा केन्द्र तोक्ने प्रक्रिया अघि बढाएका छन्। कतिपय विद्यालयहरूले आफ्ना विद्यार्थीको सुविधाका नाममा शिक्षा इकाईका अधिकारीलाई आर्थिक प्रलोभनमा पार्ने गरेको दावी छ।
सिरहाका नाम चलेका एक विदालयका संस्थापक भनेको ठाउँमा परीक्षा केन्द्र पार्न, विरोधी विद्यालयका सेन्टर असज ठाउँमा पार्नपनि खर्च हुने गरेको बताउँछन्। उका अनुसार विद्यार्थीसङ्या, विद्यालयको स्तर अनुसार एउटा विद्यालयले ५० हजारदेखि २ लाख रुपैयाँ बुझाउने गरेको छ।
तर, जिल्ला शिक्षा विकास तथा समन्वय इकाई सिरहाका प्रमुख दीपक कलौनी यस विषयलाई ठाडै नकारछन्। उनी परीक्षा केन्द्र निर्धारण भईसकेको र सार्वजनिक गर्ने अन्तिम चरणमा रहेको बताउँछन्। प्रदेशका अन्य जिल्लाले पनि सार्वजनिक नगरेकाले अहिले कुनै ढिलाइ नभएको दाबी गरेका छन्। उनी निजी विद्यालयका संस्थापकहरुले मनपर्ने केन्द्र नपाउँदा आरोप लगाउने गरेको प्रतिक्रिया दिए।
आगामी चौत्र ७ गतेबाट हुन गईरहेको माध्यमिक शिक्षा परीक्षा (एसईई) २०८१ मा सिरहाबाट १० हजार सात सय तीन जना विद्यार्थी सहभागी हुने भएका छन्।
९५ सामुदायिक र ९३ वटा संस्थागतसहि १८८ विद्यालयहरु परीक्षामा सामेल हुने इकाई सिरहाले जानकारी दिएको छ।
परीक्षालाई व्यवस्थित, मर्यादित र परीक्षार्थीलाई सहुलियत हुनेगरी ४९ वटा परीक्षा केन्द्रहरु निर्धारण गरिएको छ। गत वर्ष ४३ वटा परीक्षा केन्द्र रहेकोमा यास वर्ष प्राविधिक घारकालागि छुटै एउटा परीक्षा केन्द्रसहित ६ वटा केन्द्रहरु थपीएको उनले जानकारी दिए।
