सिरहा २६ माघ। नेपाल पत्रकार महासंघ सिरहा शाखाका नव निर्वाचित कार्यसमितिलाई लाहान स्थित एसओएस बिद्यालयले सम्मान गरेको छ। बिद्यालयले कार्यक्रमको आयोजना गरी सिरहा शाखा अध्यक्ष मनोज बनैतासहित नव निर्वाचित कार्यसमितिलाई सम्मान तथा मायाँको चिनो प्रदान गरेको हो।
विद्यालय संचालक समितिका अध्यक्ष तथा निर्देशक सुदिपराज कुशवाहाले महासंघका नवनिर्वाचित पदाधिकारीहरूलाई सम्मानस्वरूप कदरपत्र प्रदान गर्दै आगामी कार्यकालका लागि सफलताको शुभकामना व्यक्त गरे।
सोही क्रममा अध्यक्ष कुशवाहाले पत्रकारिताको भूमिकाबारे चर्चा गर्दै समाज परिवर्तनका लागि शिक्षासँगै सचेत पत्रकारिता पनि आवश्यक रहेको बताए।
विद्यालयले पत्रकार महासंघको नव निर्वाचित कार्यसमितिलाई विशेष सम्मान गरेको भन्दै अध्यक्ष बनैताले विद्यालय परिवारप्रति आभार व्यक्त गरे। सोही क्रममा उनले शिक्षा क्षेत्रमा एसओएस विद्यालयलको स्थान उच्च रहेको आफ्नो मूल्याङ्कन गरेको बताए।
उनले विद्यालयको शिक्षण पद्धति, विद्यार्थी अनुशासन तथा सामाजिक उत्तरदायित्वबारे प्रशंसा गर्दै यस प्रकारका संस्थाले समग्र समाजमा सकारात्मक प्रभाव पार्ने उल्लेख गरे। साथै पत्रकारिता र शिक्षाबीचको सम्बन्ध मजबुत बनाउन नेपाल पत्रकार महासंघ सिरहा शाखा आवश्यक सहकार्य गर्न तत्पर रहेको बताए।
सम्मान समारोहमा विद्यालयका प्रधानाध्यापक, शिक्षक, विद्यार्थी, पत्रकार, बौद्धिक व्यक्तित्व, विद्यालय संचालक समितिका सदस्यहरूको उल्लेख्य उपस्थिति थियो।
