- रवीन्द्र उप्रेती
बर्दिवास, १६ पुस। बर्दिवास ११ स्थित निर्मल लामा बहुप्राविधिक शिक्षालयका एकसाथ विष सेवन गरेका तीन जना छात्रामध्ये एक छात्राको मृत्यु भएको छ। प्रहरीका अनुसार विष सेवनबाट सिराहा धनगढी नगरपालिका १० घर भएकी १७ वर्षीया छात्रा रिङ्कु शर्माको मृत्यु भएको हो।
शर्मालाई मङ्गलबार बिहान बर्दिवासस्थित इलाका प्रहरीले पौने १२ बजेतिर बर्दिवास ४ स्थित जङ्गली क्षेत्रबाट अचेत अवस्थामा उद्धार गरी बर्दिवास अस्पताल पुर्याएको थियो। अस्पतालका डा. रोशन अधिकारीले अस्पताल पुर्याउनु अघि उनको मृत्यु भइसकेको जानकारी दिए।
रिङ्कु साथै विष सेवन गरेका उषा पण्डित र सन्जु यादवको बर्दिवासस्थित शुभ स्वस्तिक अस्पतालमा उपचार भइरहेको छ। दुवै छात्राको अवस्था सामान्य रहेको अस्पतालका डा. उदय दिवाकरले बताए।
शिक्षालयका प्रशासकीय अधिकृत दाबा योन्जनले विष सेवन गरेका तीनै जना जियोमेट्री (अमिन) विषयको प्रथम वर्षका छात्रा रहेको बताए।
विष सेवन गर्नुपर्ने एकिन कारण खुल्न सकेको छैन। तर एकजना छात्राको टेस्ट परीक्षा बिग्रेको पीडामा विष सेवन गरेको प्रारम्भिक सोधपुछमा खुलेको छ।
शिक्षालयले केही दिनअघि लिएको टेस्टमा मृतक रिङ्कुको फिजिक्सको पेपर बिग्रिएका कारण विष सेवन गरेको अस्पतालमा भर्ना भएकी सन्जुले बताए।
सोमबार बिदाको दिन भएकाले तीनै जना छात्रा गाइड किन्न बर्दिवास बजार गएका थिए। गाइड किनेपछि रिङ्कुले लुकेर विष पनि किनेको अस्पतालमा उपचार गराइरहेका उषा र सन्जुले बताए।
बर्दिवासबाट खयरमारा फर्कने क्रममा जङ्गल क्षेत्रमा पुगेर रिङ्कुले पहिले आधा सिसी विष सेवन गरेको थियो । रिङ्कुको करकापमा परेर आफूहरूले पनि एक एक बिर्को सेवन गरेको र त्यसपछि के भयो थाहा नभएको दुवै छात्राले बताए।
रिङ्कुले विष सेवन गरेपछि ‘म त मरिहाल्छु साथै नमरे तिमीहरूलाई प्रहरीले पक्राउ गरी जेल हाल्छ’ भनेपछि डराएर बाध्य भएर एक एक बिर्को विष सेवन गरेको सन्जुले बताए। बर्दिवास प्रहरीका डिएसपी रेवतीरमण पोखरेलले घटनाबारे थप विवरण सङ्कलन र छानबिन भइरहेको बताए।
गोरखापत्रबाट।
