सिरहा, १३ पुस। सशस्त्र प्रहरी बल¸ नेपाल र भारतीय सशस्त्र सीमा बल (एसएसवी) बीच नियमित रुपमा हुँदै आईरहेको समन्वयात्मक बैठक महोत्तरीको बर्दिवासमा सम्पन्न भएको छ। सशस्त्र प्रहरी बल¸ नेपाल नम्वर २ छिन्नमस्ता बाहिनी मुख्यालय महोत्तरीको आयोजनामा डीआईजी स्तरीय काउन्टरपाटी समन्वय बैठक सम्पन्न भएको हो।
बैठकमा सीमा सुरक्षा¸ सीमा अपराध नियन्त्रण तथा रोकथाम, लागू औषध नियन्त्रण¸ सीमामा हुने अपराधिक गतिविधि नियन्त्रण लगायतका विषयमा छलफल भएको नेपाल नम्वर २ छिन्नमस्ता बाहिनी मुख्यालय महोत्तरीका बाहिनीपती सशस्त्र प्रहरी नायव महानिरीक्षक कालीदास धौवजीले जानकारी दिए।
यो नियमित बैठकले सीमा सुरक्षालाई अझ प्रभावकारी बनाउदै अघि बढ्न सहयोग मिल्ने बाहिनीले जनाएको छ।
बैठकमा सशस्त्र प्रहरी बल¸ नेपाल नम्वर २ छिन्नमस्ता बाहिनी मुख्यालय महोत्तरीका बाहिनीपती सशस्त्र प्रहरी नायव महानिरीक्षक कालीदास धौवजी तथा भारतीय सशस्त्र सीमा बल (एसएसवी) को सेक्टर हेडक्वार्टर मुजफ्फरपुरका डीआईजी दिपक कुमार, आईपीएस सेक्टर हेडक्वाटर पूर्णियाका सेक्टर कमाण्डर डीआईजी राजेश टिक्कु र सेक्टर हेडक्वाटर वेतियाका सेक्टर कमाण्डर डीआईजी एस सुव्रामनियमको उपस्थितिमा सम्पन्न भएको थियो।
कार्यक्रममा मधेश प्रदेश स्थित सशस्त्र प्रहरी बल¸ नेपालका गणपतिहरु, निमित्त गणपतिहरु लगायतका अधिकृतहरुको उपस्थिति रहेको थियो भने एसएसवीका बटालियन कमाण्डेन्टहरु¸ लगायतको उपस्थिति रहेको थियो।
सशस्त्र प्रहरी बल नेपाल तथा भारतीय सशस्त्र सीमा बल (एसएसवी) बीच नियमित रुपमा हुने डीआईजी स्तरीय समन्वयात्मक बैठकको आयोजना सशस्त्र प्रहरी बल¸ नेपाल नम्वर २ छिन्नमस्ता बाहिनी मुख्यालय महोत्तरीले गरेको हो।
