सिरहा, १४ पुस। सिरहाको गोलबजार नगरपालिका १० मा रहेको श्री घुर्मी किनार सामुदायिक वन उपभोक्ता समूहको वार्षिक साधारण सभा सम्पन्न भएको छ। उल्लेखनीय जनसहभागिताका साथ आज सामुदायिक बनको साधारणसभा सम्पन्न भएको हो।
कार्यक्रमका प्रमुख अतिथि गोलबजार नगरपालिकाका प्रमुख श्याम कुमार श्रेष्ठले सामुदायिक वनको महत्व र यसको संरक्षणका लागि सबै पक्षको योगदान आवश्यक रहेको बताए। उनले वन संरक्षण र दिगो व्यवस्थापनमा नगरपालिकाले सधैं आवश्यक सहयोग गर्ने प्रतिबद्धता समेत जनाए।
साधारण सभालाई सम्बोधन गर्दै वडा नम्बर १० का वडा अध्यक्ष उपेन्द्र मुखियाले वन उपभोक्ताहरूले देखाएको सक्रियता र जिम्मेवारीलाई प्रशंसा गर्दै वनको दिगो संरक्षण र व्यवस्थापनमा वडाको भूमिका अझ सशक्त बनाउने धारणा राखे।
सव–डिभिजन वन कार्यालयका प्रमुख मोहम्मद आविद हुसेनले सामुदायिक वनले पर्यावरणीय सन्तुलनमा महत्वपूर्ण योगदान पुर्याएको र आगामी दिनमा यसको थप विकास र संरक्षणका लागि सहकार्य आवश्यक रहेको बताए।
उनले बिगत लामो समयदेखी निष्क्रिय रहेका यस समूहले नयाँ कार्यसमिति चयन गरेको २ वर्षपछि प्रथम साधारण सभाको आयोजना गरिएको प्रती प्रशंसा गरे।
सभामा घुर्मी किनार वन उपभोक्ता समुहको अध्यक्ष ज्ञान कुमार सिंहले वार्षिक प्रतिवेदन प्रस्तुत गरिनुका साथै वन व्यवस्थापन, संरक्षण र आर्थिक गतिविधिकाबारे प्रकाश पारेका थिए। उनले साधारण सभामा वन क्षेत्रको संरक्षण र पर्यावरणीय सन्तुलन कायम राख्ने विषयमा विभिन्न योजनाहरू प्रस्तुत गरेका थिए।
कार्यक्रमको सञ्चालन वन समूहका सचिब मुकेश कुमार यादवले गरेको थिए।
