सिरहा, १ पुस। गोलबजार खाने पनी तथा सरसफाई उपभोक्ता समितिको यहि पुस ५ गते शुक्रवार हुन गईरहेको निर्वाचनले अहिले माहोल तातेको छ। समितिको निर्वाचनमा दलहरुको चासो बढेसँगै माहोल तातिन थालेका हुन्।
विशेष गरेर गोलबजार ४ र ६ मा बढी उपभोक्ता रहेको खानेपानी समितिको निर्वाचनमा अहिले दलहरुले चाँसो देखाएका छन्। निर्वाचनको र्याली तथा घरदैलो कार्यक्रमहरुमा उम्मेदवर, उपभोक्ताभन्दा बढी दलका नेताहरुको लर्को देखिने गरेको छ।
निर्वाचन लक्षित तामझामसहितको प्रचार प्रशारका कारण गोलबजार नगरपालिकाको मूख्य क्षेत्र गोलबजार ४ र ६ दिनभरीजस्तै चहल पहल हुने गरेको छ। कुनै बेला प्रचार प्रशार, कुनै बेला घरदैलो त कुनै वेला नेताहरुको हुलले अहिले चुनाबी माहोल बनेको छ।
खाने पनी तथा सरसफाई उपभोक्ता समितिको निर्बाचनमा जिवछ साह, प्रमोद लामाले अध्यक्षसहितको प्यानल नै उम्मेदवारी दिएका छन्।
विनोद कुमार सिंहले पनि प्यानल नै बनाएर उम्मेदवारी दिएका छन्। पछि उनले विभिन्न प्रभावमा प्रमोद लामालाई समर्थन गरेका छन्। उनका अन्य उम्मेदवार भने अझै प्रचार प्रसारमा छन्।
श्रीलाल लामाले पनि अध्यक्ष पदमा उम्मेदवारी दिएका छन्। उनको प्यानल छैन। उनी अहिले प्रचार प्रसारमा पनि छैन।
सवै समूहले उपभोक्तालाई आफ्नो पक्षमा पार्न विभिन्न आश्वासनहरु बढीरहेका छन्। साह र लामा दुवै पक्षले आ–आफूलाई बलियो देखाउने प्रयास गरिरहेका छन्।
साहलाई नेकपा (माओवादी केन्द्र)ले समर्थन जनाएको छ। साहलाई स्थानीय व्यवसायीहरुको पनि राम्रो साथ सहयोग रहेको बताइन्छ।
लामालाई नेकपा एमाले, नेपाली कांग्रेस, जनता समावादी पार्टी (जसपा)नेपाल र नेकपा एकीकृत समाजवादी पार्टीको साथ सहयोग रहेको छ।
