घरको एक्लो छोराको मृत्युको खबरले बुवाको आँशु थामिएको छैन भने श्रीमती भावविह्वल छिन् । दुई अवोध छोरीले भने केही भेउ पाउन सकेकी छैनन्।
बसबरिया गाउँपालिका–१ मानपुरका साह तीन वर्ष अघि साउदी पुगेका थिए । सन् २०२१ मा सउदीस्थित अएद दहिम अल हमाउत एण्ड पार्टनरर्स ट्रेनिङ कम्पनीमा कामदारका रुपमा गएका साह २०२३ मा फर्किने सम्झौता थियो । तर कम्पनीले फर्किने समयमा भिजा नदिएका कारण उनी घर फिर्न सकेका थिएनन् । सम्झौता अवधि गुजारिसकेका साहलाई कम्पनीले विदा र बिरामी परेका दिन पनि काम गर्न लगाउने गरेको उनका परिवारजनले बताएका छन्।
तनाबका बीच काम गर्नुपर्दा र कम्पनीको लापारवाहीले छोराको ज्यान गएको उनका बुवा भिखारी साहले बताए। घरको एक्लो छोराको मृत्यु भएपछि बुहारी र दुई नातिना कसरी हुर्काउने भन्ने भिखारीको चिन्ता छ। ‘म उमेरले ६० कटिसके, घरको जिम्मेवारी छोराको काँधमा थियो, त्यही जिम्मेवारी बुझेर छोरा विदेश गयो, कम्पनीको लापारवाहीका कारण छोराको दुर्घटनामा मृत्यु भयो,’ उनले भने, ‘बुढेसकालमा ठूलो दुःखको सामना गर्नुपरेको छ।’
घरको साहारा नै गुमेका कारण दुई छोरीको पालनपोषण र बृद्घ बुवाको हेरचाह गर्न समस्या भएको उनकी पत्नी मिना कुमारीको दुःखेसो छ। ‘घरको आर्थिक अवस्था उकास्नका लागि बैदेशिक रोजगारीमा गएको श्रीमानको शव कुरिरहेका छौं,’ मृतक साहकी पत्नी मिनाले भनिन्, ‘दुई छोरीको पालनपोषण र बृद्घ बाको हेरचाह कसरी गर्ने भन्ने चिन्ता पनि थपिएको छ, मैले पति गुमाए, मेरा दुई छोरीले बा गुमाए र बृद्घ बाले एक्ला छोरा गुमाउनुभयो, परिवारमा सबैभन्दा ठूलो बज्रपात आइपरेको छ।’
उनका अनुसार सम्पत्तिको नाममा साह परिवारसँग घरखेत गरी ५ कट्ठा जग्गा छ तर, ८ लाख भन्दा बढी कर्जा लागेपछि उनी बैदेशिक रोजगारमा जानुपर्ने बाध्यता आइलागेको थियो । पीडित परिवारले शव झिकाउनका लागि बैदेशिक रोजगार बोर्ड तथा न्याय र क्षतिपुर्तीका लागि साउदीस्थित नेपाली राजदुतावासमा समेत आग्रह गरेका छन्।
