सिरका दक्षिणी भेगमा पनि खानेपानीको समस्या

जीवछ यादव

लहान, २२ वैशाख। लोकमार्गदेखि दक्षिणी भेगमा हातेकल सुक्न थालेपछि खानेपानीको समस्या देखिन थालेको छ। मोटरजडान गरेर खानेपानीका लागि पर्याप्तता पानी उपलब्ध हुने दक्षिणी भेगमा देखिएको समस्याको समाधान नभए विकराल परिस्थिति आउने स्थानीयहरूले चिन्ता जाहेर गरेका हुन्।

नेपाल खानेपानी संस्थान लहानका प्रमुख श्रीष भण्डारीका अनुसार प्रत्येक वर्ष दुई मिटर खानेपानीको सतह तल गइरहेकाले लोकमार्गदेखि दक्षिणी भेगमा पनि यसवर्ष समस्या देखिएकै हो। खानेपानीको धारा जडानका लागि आउने निवेदनका चाप विगत वर्षहरूको तुलनामा बढी देखिएको उनले बताए। यो समस्या लहान नगरपालिकाको पुरानो १० वटा वडाहरूमा देखिन थालियो।

१० वर्ष अगाडि यो समस्या लहान नगरपालिकाको दुई वडामा मात्रै थियो। अहिले सहरी क्षेत्रको १० वटै वडामा यो समस्या देखिएको छ।

लहान वडा नम्बर २ र ३ लोकमार्गदेखि दक्षिणका हातेकलहरु सुक्न थालेपछि खानेपानी, नुहाउन र गाइवस्तुलाई समेत खानेपानीको समस्या भएको लहान २ का विजय कुमार यादवले बताए । साथै यस वडामा उत्पादन गरिने तरकारी खेतीलाई पनि समस्या भएको उनको भनाइ छ।

लहान २ मा खानेपानीका लागि जडान गरिएका हाते कलहरू सुक्न थालेपछि एक सयभन्दा बढी घर परिवार रहेका बस्तीमा ६३ घरमा धारा जडान गरिएको वडाध्यक्ष सियाराम यादवले जानकारी दिए।

यस वडामा समरर्सियल बोरिङग जडान र खानेपानीको धारा जडान बाहेक अर्को भरपर्दो विकल्प नभएको उनको भनाइ छ।

सिराहा जिल्लाको लहान, धनगडीमाई, गोलबजार, मिर्चैया र कर्जन्हा नगरपालिकाहरूमा समेत लोकमार्गदेखि दक्षिणी भेगमा देखिएको खानेपानीको समस्या चुरे क्षेत्रमा अवैध तरिकाले भएको वन विनाश, गिटी बालुवा उत्खनन् प्रमुख कारण रहेको वातावरणविद् दिनेश कुमार यादवले बताए।

उनले भने, ‘‘प्रथम राष्ट्रपति डा. रामवरण यादवले चुरे संरक्षण कार्यक्रम ल्याएर थालिएको प्रयासलाई प्रभावकारी ढङ्गले सरोकारवालाहरूले कार्यान्वयन गरेको भए आज यो समस्या आउने थिएन।’

गोरखापत्रबाट।