सेफ्टी ट्याङकमा निसासिएर सरसफाई मजदुरको मृत्यु

जनकपुरधाम, १७ चैत। धनुषाको धनुषाधामस्थित सार्वजनिक शौचालयको सेफ्टी ट्याङ्क सरसफाई गर्ने क्रममा निसासिएर एक मजदुरको मृत्यु भएको छ।

सफा गर्न सेफ्टी ट्यांकमा पसेका स्थानीय करिव ४५ वर्षीय ठेकु मल्लिकको निसासिएर मृत्यु भएको प्रहरीले जनाएको छ।

स्थानीय विनय यादवका अनुसार नगरपालिकाले तलबभत्ता नतोकेपछि काम छाडेका ठेकु आज काममा गएका थिए। उनको मृत्यु भएको खबर आएपछि मात्रै परिवारले ठेकु काममा गएको जानकारी पाएको विनयले बताए।

प्रहरीले शव पोष्टमार्टमका लागि प्रादेशिक अस्पताल जनकपुरधाम पठाएको छ।