निजगढ विस्फोटमा परेर मृत्यु हुनेको संख्या ३ पुग्यो

काठमाडौं, १५ फागुन। बाराको निजगढमा शंकास्पद वस्तु विस्फोटमा परी मृत्यु हुनेको संख्या तीन पुगेको छ। तीन जना घाइतको उपचार भइरहेको छ।

निजगढ नगरपालिका ७ मा रेशम मगरले सञ्चालन गरेको वर्कसपमा सोमबार मध्याह्न विस्फोट भएको थियो। विस्फोटमा परी घाइते भएका वीरगञ्ज ९ का रितु रजतको बयोधा अस्पतालमा उपचारका क्रममा मंगलबार बिहान निधन भएको हो।

वर्कसप सञ्चालक ४५ वर्षका रेशम, भारतका राकेश जैसवालको पनि उपचारकै क्रममा बयोधा अस्पतालमा उपचारका क्रममै सोमबार मृत्यु भएको थियो।

थप तीन जना घाइतेको उपचार भइरहेको छ। निजगढका सूर्यबहादुर थापाको सामुदायिक प्रसूति गृहमा उपचार भइरहेको छ भने वीरगञ्जका फिरोद देवान र भारतका अरविन साहको बयोधामा उपचार भइरहेको छ।

बारा प्रहरीका अनुसार घटनाको अनुसन्धानका क्रममा कवाडी किन्ने भारतका रमेश जैसवाल र निजगढका टिकाराम पाख्रिनलाई पक्राउ गरेको छ।