लुम्बिनी, ३ फागुन। कपिलवस्तुमा यात्रुबहाक बस दुर्घटना हुँदा १० जनाको मृत्यु भएको छ। कपिलवस्तुको शिवराज नगरपालिका १ सुरही पुल नजिकै सु–प–प्र–०२–००१ ख ००९८ नम्बरको यात्रुवाहक बस दुर्घटना हुँदा १० जनाको मृत्यु भएको हो। दुर्घटनामा ३० जना घाइते भएका छन्।
बुधबार राति १ बजे महेन्द्रनगरबाट काठमाडौं जाँदै गरेको सुनौलो महाकाली यातायातको बस बाटोबाट २ सय मिटर तल खसेको जिल्ला प्रहरी कार्यालय कपिलवस्तुले जनाएको छ।
घाइते मध्ये ९ जनालाई उपचारका लागि बुटवल रिफर गरिएको छ। अन्यको सञ्जीवनी र आधारभूत अस्पतालमा उपचार भइरहेको कपिलवस्तुका एसपी नवरत्न पौडेलले जानकारी दिए।
जिल्ला प्रहरी कार्यालय कपिलवस्तुका सूचना अधिकारी डीएसपी हरिबहादुर वलीका अनुसार मृतकमध्ये तीन महिला र चार पुरुष छन्। उनीहरूको सनाखत हुन सकेको छैन। घाइते सबैको उद्धार गरी अस्पताल पठाइसकिएको प्रहरीले जनाएको छ। बसमा ४० यात्रु सवार सवार रहेको र चालक पनि घाइते रहेको प्रहरीले बताएको छ।
तिव्र गतिका कारण बस सडकबाट तल खसेको प्रहरीको प्रारम्भिक अनुमान छ।
