जनकपुर, २९ मंसिर। धनुषामा ६ वर्षीया एक बालिकाको शव गाउँ नजीकैको पोखरीमा फेला परेको छ। तीन दिनदेखि हराइरहेकी सबैला नगरपालिका ९ सतोखरका राकेश यादवकी ६ वर्षीया छोरी राखीको शव आज (शुक्रबार) बिहान फेला परेको हो।
प्रहरी र स्थानीयले खोजी गर्ने क्रममा हत्या गरेर गाउँ नजीकै पोखरीमा फालेको अवस्थामा शव फेला परेको जिल्ला प्रहरी कार्यालय धनुषाका एसपी मित्रबन्धु शर्माले जानकारी दिए।
‘प्रहरी अहिले बालिकाको हत्यामा संलग्न भएको आशंकामा दुईजना पक्राउ परेका छन्।
बालिकाको शवको प्रकृति हेर्दा बलात्कारपछि उनको हत्या भएको आशंका स्थानीयले गरेका छन्। प्रहरीले भने यस विषयमा केही भनेको छैन।
‘बालिकाको शवको पोष्टमार्टमपछि मात्रै बलात्कार गरेर हत्या भए÷नभएको खुल्ने प्रहरीले बताए।
प्रहरीका अनुसार बुधबार साँझ आमासँगै ती बालिका घरबाट एक किमी उत्तरमा रहेको सबैला ९ मा मटकोर हेर्न गएकी थिए। विवाह पञ्चमीको अवसरमा निकालिएको रथ यात्रा हेर्न गएदेखि ती बालिका बेपत्ता भएकी थिइन्।
भोलिपल्ट (बिहीबार) बिहान ९ बजेमात्रै बालिका हराएको भनेर अभिभावकले प्रहरीलाई जानकारी गराएका थिए। प्रहरीले बालिकाका आफन्त, जनप्रतिनिधि र स्थानीयवासीलाई साथमै लिएर बालिकाको खोजी गरेको थियो।
बालिकालाई खोज्ने क्रममा तालिम प्राप्त कुकुर पनि परिचालन गरिएको एसपी अवाले बताए।
बालिकाको हत्यामा संलग्न भएको आशंकामा प्रहरीले दुईजना स्थानीयलाई नियन्त्रणमा लिएर सोधपुछ सुरु गरेको छ। उनीहरुको नाम भने प्रहरीले सार्वजनिक गरेको छैन।
