गाईघाट, ९ मंसिर। उदयपुरमा पिकनिकबाट फर्कदै गरेको स्कुल बस दुर्घटना हुँदा तीन जनाको मृत्यु भएको छ। उदयपुरगढी गाउँपालिका ७ अँधेरीमा त्रियुगाको अन्नपुर्ण सेकेन्डरी स्कुलको बस प्र–०५–००१ ख ००४४ नम्बरको स्कूलबस पल्टिँदा चालक सहित तीन जनाको मृत्यु भएको हो।
दुर्घटनामा बसका चालक ४० वर्षका भिखन चौधरी, ६ वर्षकी सम्या चौधरी र ७ वर्षका विकास चौधरीको मृत्यु भएको जिल्ला प्रहरी कार्यालय, उदयपुरका सूचना अधिकारी डीएसपी हरिनन्द चौधरीले जानकारी दिए।
घाइतेमध्ये गम्भीर अवस्थामा रहेका १२ जनालाई थप उपचारको लागि विराटगर पठाएको उनले बताए। बसमा रहेकामध्ये थप ३२ जना सामान्य घाइते भएर जिल्ला अस्पतालमा उपचार गराइरहेका र केही घर फर्किएका चौहरीले जानकारी दिए।
स्कुल बस चालकले गाउँको पिकनिकका लागि भाडामा लगेको खुलेको छ। घटनाको थप अनुसन्धान भइरहेको डीएसपी चौधरीले जानकारी दिए।
