बर्दिवास, ११ असोज। महोत्तरी प्रहरीले कटुवा पेस्तोल र त्यसका लाग्ने एक थान गोली सहित एक भारतीय नागरिकलाई पक्राउ गरेको छ। महोत्तरीको सोनमा गाउँपालिका ५ खयरबनी चोकबाट भारतको बिहार राज्य, सितामढी जिल्ला जयनगर ग्रामपंचायत ११ का २४ वर्षीय बलबिन्द्र महतोलाई प्रहरीले पक्राउ गरेको हो।
ईलाका प्रहरी कार्यालय खैयरबनीबाट खटिएको गस्ती टोलीले भारतबाट नेपालतर्फ आउँदै गरेको बिआर ३० के ३४५९ नम्बरको मोटरसाइकललाई जाँच गर्ने क्रममा मोटरसाइकलको डिकीमा लुकाई छिपाई राखेको कटुवा पेस्तोल एक थान, सोही पेस्तोलमा लाग्ने गोली एक राउण्ड, किल्ला उक्काउने रड दुई थान र पेचकस एक थानसहित नियन्त्रणमा लिएको महोत्तरी प्रहरीले जनाएको छ।
साथै बिआर ५५ ए २७२५ नम्बरको मोटरसाइकल चालकले प्रहरीलाई देख्नासाथ मोटरसाइकल छोडी फरार भएकोमा प्रहरीले उनको खोजी गरिरहेको छ।
यस सम्बन्धमा प्रहरीले आवश्यक अनुसन्धान गरिरहेको जनाएको छ।
