सिरहा, २६ बैशाख। सिराहाको गोलबजार नगरपालिका ४ मूख्यचोकको चिया खाजा पसलमा ग्यास लिक भई आगलागी हुँदा १५ लाखभन्दा बढीको धनमाल जलेर नष्ट भएको छ। पसलको लागि आलु उसिन्न ग्यास चुल्हो बाल्ने क्रममा सिलिन्डरबाट ग्यासलिक भएर गोलबजारनपा ३ का जोगाी साह हलुवाईको चिया पसल र उतिमलाल महतोको किसाना पसलमा आगलागी हुँदा १५ लाख बराबरको धनमाल जलेर नष्ट भएको हो।
इलाका प्रहरी कार्यालय गोलबजारका निमित्त प्रमुख सई विश्वबाबु बुढाथोकीका अनुसार मंगलबार बिहान करिब ३ बजेतिर ग्यास बाल्ने क्रममा लिक हुँदा आगलागी भएको जानकारी दिए।
ग्यास लिक भएर आगलागी हुँदा भरेर राखिएका चारवटा सिलिन्डर विस्फोट भएका छ। विस्फोटबाट र आगलागीका कारण खाजा तथा किराना पसलका सबै सामान जलेर नष्ट भएका छन्। आगलागीबाट पसलको दुई टहरा, खाजा पसलछेउमै उत्तिमलाल महतोको काठको कठघरामा रहेको किराना पसलसमेत जलेर ध्वस्त भएको छ।
आगलागीबाट पसलमा खाजा बनाउन राखिएका सामग्री, लत्ताकपडा, भाँडावर्तन, नगदसहित १२ लाखभन्दा बढी र किराना पसलको करिब तीन लाख रुपैयाँबराबरको क्षति भएको प्रारम्भिक अनुमान गरेको प्रहरीले जनाएको छ ।
गोलबजार नगरपालिकाको बारुणयन्त्र, प्रहरी र स्थानीय बासिन्दा समेतको सहयोगमा दुई घन्टापछि बिहान करिब ५ बजेतिर आगलागी नियन्त्रणमा लिइएको प्रहरीले जनाएको छ।
