राजविराज, २५ पुस। सप्तरीमा रोकिराखेको टिपरमा दुई वटा मोटरसाइकल ठोक्किंदा दुईजनाको मृत्यु भएको छ। दुईजना घाइते भएका छन्।
आईतबार दिउँसै हुलाकी सडक खण्डअन्तर्गत जिल्लाको खडक नगरपालिका ११ मा बिग्रेर रोकिराखेको स १ ख ९२८ नम्बरको टिपरमा बा ८९ प ३२१५ नम्बरको मोटरसाइकल ठोकिंदा चालक खडक नगरपालिका ११ बनौलीका २० वर्षीय बैजु भन्ने बैजनाथ चौधरी र प्रदेश १–०२–०४४ प ८६१९ नम्बरको मोटरसाइकल चालक डाक्नेश्वरी नगरपालिका १० का २२ वर्षीय रामाकान्त चौधरीको मृत्यु भएको हो।
दुवै युवकको घटनास्थलमै मृत्यु भएको प्रहरीले जनाएको छ।
बोदेबर्साइनबाट राजबिराज तर्फ जाँदै गरेका दुईवटा मोटरसाइकल रोकि राखेको टिपरमा ठोक्किएको प्रहरीले जनाएको छ।
दुवै मोटरसाइकलमा पछाडि सवार दुई युवक गम्भीर घाइते भएका छन्। टिपर र चालकलाई नियन्त्रणमा लिइ थप अनुसन्धान गरिरहेको जिल्ला प्रहरी कार्यालय सप्तरीले जनाएको छ।
