कर प्रशासनलाई मैत्रीपूर्ण बनाउन युवा उद्यमीको आग्रह

वीरगञ्ज, २ मंसिर। वीरगञ्जका युवा उद्यमीहरुले कर प्रशासनलाई करदातामैत्री बनाउन आग्रह गरेका छन्। कर दिवसको अवसरमा नेपाली युवा उद्यमी मञ्च (एनवाईईएफ) वीरगञ्जले आयोजना गरेको कर सम्बन्धी अभिमुखीकरणमा युवा उद्यमीहरुले करदातामैत्री कर प्रशासन भए मात्रै राजस्व संकलनमा बृद्धि हुने विश्वास व्यक्त गरेका हुन्।

एनवाईईएफ वीरगञ्जका अध्यक्ष राकेश साहले करको दायरा विस्तार गरी करदातालाई सम्मान गर्नुपर्नेमा जोड दिए। कर दर्ताको प्रक्रिया सहज बनाए मात्रै करदाता कर तिर्न उत्साहित हुने अध्यक्ष साहको भनाई थियो।

एनवाईईएफ वीरगञ्जका निवर्तमान अध्यक्ष अनुप अग्रवालले करका प्रावधान र प्रक्रियाका बारेमा करदातालाई सचेत बनाउने खालका चेतनामूलक कार्यक्रम आयोजना गर्न आग्रह गरेका छन्।

अभिमुखीकरणमा वीरगञ्जस्थित आन्तरिक राजस्व कार्यालयका प्रमुख कपिलप्रसाद सुवेदीले उद्यमीहरुलाई करका विविध पक्षका बारेमा जानकारी दिएका थिए।

प्रमुख सुवेदीले कर तिर्नु राज्यप्रति करदाताको दायित्व भएको बताउँदै सरकारले करको दायरा फराकिलो बनाउन यसका प्रक्रियाहरूलाई सहजीकरण गरेको बताए। पछिल्लो समयमा प्रविधिको प्रयोगबाट कर प्रणाली करदातामैत्री बन्दै गएको पनि उनले स्पष्ट पारे।